Beynəlxalq Güləş Federasiyaları Assosiasiyası (FİLA) bütün zamanların ən güclü 100 pəhləvanının siyahısını dərc edib. “APA-SPORT” agentliyinin məlumatına görə, FİLA siyahını gənclər və kişilər arasında keçirilən qitə və dünya çempionatlarında, o cümlədən Yay Olimpiya Oyunlarında qazanılan medalların əyarına və sayına uyğun formalaşdırıb.

Buna əsasən, planetin ən güclü 100 güləşçisinin siyahısına karyerası ərzində 30 qızıl və 2 gümüş medal qazanan rusiyalı Aleksandr Karelin başçılıq edir. Kubalı Milian Hektor (23 qızıl, 9 gümüş, 2 bürünc) ikinci, türkiyəli Hamza Yerlikaya (23 qızıl, 4 gümüş, 3 bürünc) üçüncü pillədə qərarlaşıb. Azərbaycan isə siyahıda cəmi bir pəhləvanla təmsil olunub. 2000-ci ildə Sidneydə keçirilən Olimpiadada ölkəmizin şərəfini qoruyan İslam Duquçiyev 9 qızıl, 2 gümüş və 1 bürünc medalla 55-ci yeri tutub.
Qeyd edək ki, əslən rusiyalı olan İ.Duquçiyev Sidney Olimpiadasından əvvəl yunan-Roma güləşi üzrə milli komandamızın heyətinə cəlb edilmişdi. Amma karyerası ərzində dörd dəfə dünya çempionu olan İ.Duquçiyev Olimpiadada 69 kq çəki dərəcəsində yalnız 6-cı yeri tuta bilib.

Rəsmi Budapeşt Türkiyənin Azərbaycan və Türkmənistandan «Nabucco» kəmərilə nəql olunacaq təbii qazın digər ölkələr tərəfindən alınmasına məneəçilik törətməyəcəyinə əmin olmaq istəyir.

«APA-ECONOMICS»in «Reuters» agentliyinə istinadən verdiyi məlumata görə, bunu Türkiyədə səfərdə olan Macarıstanın iqtisadiyyat və nəqliyyat naziri Yanoş Koka bildirib.
Y.Kokanın sözlərinə görə, «Nabucco» layihəsi hesabına Türkiyə qaza olan daxili tələbatını ödəmək fikrindədir və konsorsiumun üzvü olan digər dövlətlər Xəzərdən Avropaya qazın fasiləsiz tranzitinə zəmanət almaq istəyir. Bununla yanaşı, macarıstanlı nazir Türkiyə ilə bununla bağlı razılığın layihənin icrasına başlanmamış əldə olunacağına əmin olduğunu vurğulayıb.
Qeyd edək ki, ümumi dəyəri 5 mlrd. avro olan «Nabucco» layihəsi Xəzər bölgəsindən Azərbaycan, Gürcüstan, Türkiyə, Bolqarıstan, Rumıniya, Macarıstan və Avstriya ərazisilə Avropaya təbii qazın nəqlini nəzərdə tutur. Kəmərin inşasına 2009-cu ildə başlanması və 2012-ci ildədək istismara verilməsi planlaşdırılır. Layihənin icrası ilə bağlı yaradılmış konsorsiuma artıq 5 investor üzv olub - OMV (Avstriya), MOL (Macarıstan), «Botaş» (Türkiyə), «Bulgargaz» (Bolqarıstan) və «Transgaz» (Rumıniya).

Milli Televiziya və Radio Şurası (MTRŞ) “Radio-Frans”ın Azərbaycanda yayımının dayandırılması barədə qərar çıxarıb.

Bu barədə APA-ya MTRŞ sədri Nuşirəvan Məhərrəmli bildirib. MTRŞ sədri deyib ki, xarici radionun yayımı noyabrın 30-da dayandırılacaq: “Biz 7-8 aydır, radioya sənədləri təqdim etmələri, lisenziya almaları barədə müraciət etsək də, təəssüf ki, buna qeyri-ciddi yanaşdılar. Bu günə qədər də həmin radiodan bir xəbər yoxdur. Ona görə də belə qərar çıxardıq”.